Кога веќе сте решиле да не затворите дома – направете го тоа на ВИСТИНСКИОТ НАЧИН!
Можеби ова е вистинскиот начин, можеби и не е. Останува да видиме крајните резултати што ќе покажат. Единствено нешто што знаеме откако почна првичниот полициски час е дека ништо не е сменето на подобро, напротив бројките прогресивно растат.
Сега од понеделник до петок од 16 часот до 5 часот наутро и за цел викенд ќе бидеме затворени дома.
Тоа значи дека тие што се на работа ќе треба да се вратат дома до 16 часот! Значи луѓе што работат уште дополнително ќе брзаат да се вратат, да испазарат, да се спремат за изолација. Кај цела недела ќе работат, вие им го ускратувате правото да видат бел ден за време на викенд, кога им е единствениот момент да излезат на воздух и да протегнат нозе, да прошетаат сонце да ги види? Зарем тие не се луѓе?
Пак си играте со пола-пола ситуација.
Или сите дома или сите на работа, што не е јасно?
Знаете ли вие што ќе биде сега по продавниците и аптеките? Како во предвоена состојба! Редици и редици, особено пред викенд, каде секој ќе проба да приграби што повеќе бидејќи вие сте тие што ги ставате во неприродна положба, да биде затворен дома незнаејќи утре што го чека. Па токму во тие редици вирусот може рапидно да се рашири. Да не збориме по банките што ќе биде. Хаос, лудило, во најмала рака буткање и неред.
Пред некој ден изјавивте дека полека се вртите кон картата на создавање колективен имунитет, за сепак да излезете со уште порестриктивни мерки? Контрадикторни сте самите према себе. Не сте доследни, едно зборите, друго мислите, за на крај сосема нешто трето да направите! Одлучете се веќе еднаш, или џа или бу!
На крајот верувајте дека ќе се бориме преку создавање колективен имунитет, сакале или не, бидејќи ова ниту ќе престане, ниту има некаква шанса да се искорени! Заклучокот е дека мораме да бидеме посилни од вирусот, само на тој начин можеме да го победиме, на негов терен! Времето ќе покаже.
Во меѓувреме пробајте да останете смирени во вашите домови. Гледајте да го искористите времето креативно и продуктивно бидејќи никој нема да ви го надомести ниту пак врати. Не дозволувајте, иако сте изолирани, времето да ви отиде во неповрат. Сега е време да вложите во себеси. Доста вести, доста отрови, доста самите вршите притисок на мозокот и на срцето. Колку можете повеќе опуштете се во своите домови и дајте си мир и спокојство. Вие го заслужувате тоа.
Чувајте се.
0
