Мајка со бебе СЕКОГАШ има предност!
Од секогаш важело правилото дека мајка која е со бебе во количка има предност пред останатите, било да станува збор за продавница, аптека или друга установа, таа секогаш треба да помине преку ред за да не чека. Јас навистина не знам кога ова правило престанало да важи? Толку ли луѓето се променети, нетрпеливи и несвесни дека тоа е една добра особина, една основна култура која важи секаде низ светот?
Ова ни го напиша една наша читателка:
„Не сум толку револтирана колку што сум искрено зачудена од тоа што ми се случи вчера. Бев во пошта со моите две дечиња, од кои едното е бебе од три месеци, како би подигнале пратка која ни стигна пред некој ден. Кога отидовме таму имаше редица од околу 20 луѓе. Сите уредно си чекаа и истото го направивме и ние. Си застанавме во редот и чекавме да ни дојде редот. Се ќе беше во ред се додека бебето не почна да плаче. Ама ете го земав во раце и тоа секако се смири. Никој ама буквално никој не се ни сврте да каже: „Ајде госпоѓо идете пред нас, вие имате предност“. После 15тина минути стоење во ред, позади шалтерот дојде уште еден вработен (замислете машко, додека двете кои работеа беа жени) за да се забрза работата, и веднаш штом не виде викна: „Вие со бебето, ајде дојдете веднаш на шалтер“. Ете на крај се најде некој разумен кој дозволи побрзо да ја завршиме работата.
Добро драги луѓе, сограѓани, Македонци, па зарем мислите дека јас со чиста свест би тргнала во сред гужва во пошта, или друг пат во продавница, со двете деца со мене доколку немам некој да ги причува за да завршам работа, или некој тоа да го направи наместо мене? Зарем мислите дека јас би ги малтретирала нив или пак себеси со тоа што ги носам секаде штом имаме некаква потреба? НЕ! Јас едноставно немам каде во тој момент да ги оставам, а работата мора да биде завршена. Ве молам нареден пат размислете, ставете се не само во моја кожа, туку во кожата на секоја мајка која се соочува со овој проблем и постапете правилно. Јас никогаш нема да побарам од вас да ме пуштите преку ред, тоа ќе го оставам на вас, да го направите вистинскиот потег и да ми излезете во пресрет.“ – Елена
Дајте да бидеме хумани, разумни, одговорни, присебни и трпеливи. Мајките кои ги извршуваат не само домашните работи туку и надворешните работи и те како им е потребна вашата помош. Не да им испазарите или подигнете нешто, не, само да им отстапите ред пред вас, ништо повеќе. Тие ќе ви бидат и повеќе од благодарни. Да си помогнеме едни на други. Да бидеме човечни.
0
