Родителот е задолжен за здравите навики на своето дете
Поразителен тренд кој е во пораст во последно време е дебелината кај малите деца. За тоа има само еден виновник и никој друг, а тоа е РОДИТЕЛОТ! Што вие ќе му направите за јадење, детето тоа ќе го јаде. Ако го наполните фрижидерот со нездрави продукти, мајонези, паштети, виршли, сувомеснати производи, лиснати пецива, а полиците со чипсови, грицки и разни благи закуски, тогаш бидете спремни тоа да се одрази на здравјето и пред се на телесната тежина на вашето дете.
Воопшто не е лесно да се променат навиките во исхраната кај вашите деца, но мора од некаде да почнете доколку сакате да израснете силни и здрави индивидуи, кои лесно ќе ги надминуваат сите настинки и вируси, ќе бидат фит и енергични, и секоја активност ќе ја извршуваат без мака и тежина.
Децата јадат тоа што родителот јаде! Ако вие за појадок внесувате бел леб намачкан со некаков намаз, бело пециво, мекици или бурек, тогаш и вашето дете тоа ќе го јаде, но доколку вие правите каша од житарки, со какао, мед и парче овошје, тогаш бидете сигурни дека и детето ќе го следи вашиот пример.
Вашето здравје и здравјето на вашето дете се испреплетени и меѓусебно зависни!
Родителот ги гради здравите навики на своето дете. Наполнете ги полиците со свежо овошје и зеленчук. На масата секогаш во една посуда нека има свежи портокали, мандарини, јаболки, киви, банани и секој вид на овошје кое е типично за тој период од годината. Дозволете им сами да посакаат да каснат нешто здраво кога ќе им се пријаде помеѓу оброк.
Ако родителите не учеле дека без леб ручек не поминува, знајте дека тоа не е баш вистина. Кога имате за ручек припремено месо и компири, наместо леб ставете на масата една голема салата. Нека помине ручекот без леб, но никогаш нека не поминува без свежа салата. Компирот е замена за леб. Исто и кога имате ориз за ручек или вечера, лебот не е потребен. Тоа е исто како да сервирате чинија паста со парче леб до неа. Не иде, нели. Помалку леб, помалку празни калории.
Како што си посакувате добро здравје на себеси, така и на своето дете му го посакувате истото. Со тоа што ќе внимавате на себе, потсвесно ќе внимавате и на вашето дете. Немојте да дозволите вие да бидете виновник за нездравите навики кои вашето дете ќе ги создаде и за „модерните“ болести кои можат да му се прикачат во подоцнежните години поради нездравото детство во кое растел.
Градете здрави навики за себе и за своите најмили, затоа што здравјето е најважно нешто во животот.
0
