Кој подобро чува дете – Баба или Градинка?

Породилното завршува и време е да се вратите на работа. Доколку имате „баба на располагање“ која е во пензија и без сомнеж се согласува да го чува своето мило внуче, се поставува прашањето дали да се остави бабата да го чува и расне или детето да се запише во градинка.

Постои само еден одговор, а тоа е детето да се запише во градинка. Еве и зошто:

• Детето ќе биде во средина полна со негови врсници, од кои ќе учи, со кои ќе дели и игра и секако преку тоа ќе се социјализира.

• Ќе учи нови работи заедно со своите другарчиња, како песнички, игри, разни техники низ цртање, боење, лепење, креирање итн.

• Како и кај баба тоа ќе биде згрижено на топло место, каде ќе има јадење, пиење и ќе може да ги извршува сите потреби кои ги има, но сето тоа збогатено со многу другарчиња или „колеги од градинка“

• Бидејќи во градинките има безброј вируси и настинки, верувајте дека тоа повеќе од половина време ќе биде дома отколку во градинка, или во превод една недела градинка, две недели дома на лечење. Преку тоа се зајакнува и самиот имунитет на детето. Боледувања ќе земате кога ќе можете, но во останатите случаи бабата е секако првата и единствена опција за згрижување и чување на вашето дете.

• Можеби ќе речете дека бабата ќе го прошета, изнесе на воздух, ќе го истрча детето надвор. Да, можеби. Но колку од бабите се реално во можност да трчаат по едно темпераменто живо дете кое сака и од невозможното да направи возможно, да го однесат на Водно, во парк, во зоолошка или негде подалеку. Тоа секако би било пред зграда или на најблиските лулашки, ако има такви и тоа би било секако кратко и воздржано. Најдобрите прошетки и надворешни активности детето може да ги има само со своите родители, кои се пред се помлади и спремни да трчаат во секој поглед по своето чедо.

• Дозволете им на бабите да уживаат во нивните „поодминати“ години. Тие без збор ќе прифатат да ја пружат целата своја љубов и да се посветат максимално на своите внучиња, но не заборавајте дека тоа се пред се жени кои своето го одработиле и дека и тие заслужуваат оддишка во овие години после растењето свои деца, истовремено работејќи за да дојдат до оваа фаза, фазата на пензија каде треба да одмараат, да шетаат и да се посветат на самите себеси. Дозволете им го тоа, а пред се тргнете од самите себе и видете дека сте човек кој работи 24/7, со полна пареа, љубов и посветеност, исто како и вашите мајки во нивното време.

Затоа прашањето за тоа кој подобро го чува вашето дете е можеби и несоодветно поставено. Тоа секако ќе биде одлично згрижено и во обата случаи.

Секоја мајка го сака најдоброто за своето дете без сомнеж. Но размислете добро и запрашајте се, што е всушност најдоброто за нив. Одлуката е ваша.