СТОП за рушење на Универзална сала! Апасиев помагај!
Колку и да е директен, на моменти дрзок и безобразен, без избрани зборови кои доликуваат на еден доктор на науки и наскоро пратеник, не може а да не се согласиме со коментарот на г-динот Апасиев во врска со Универзална сала, која е една од малкуте кои се бројат на прсти – знаменитости кои се одбележје и дел од историјата на нашиот главен град Скопје.
Еве како тој ја искоментира одлуката која „сеуште се разгледува“, (мижи асан да ти баам), која најверојатно ќе биде и остварена, секако поучени по претходни дела и постапки на лицата задолжени за унаказување на нашиот мил град, нашето „се само модерно не“ асфалтно Скопје.
Изградена со солидарна помош на 37 земји! Потсеќа на римскиот Пантеон. Симбол на главниот град… И иде еден пијаница и ќе ја рушел!? Оти само за рушење знаат. Ништо немаат изградено. Чунки, толку им се способностите. Мизерија од луѓе и од "карактери". #УниверзалнаСала
— Апасиев (@apasiev) July 28, 2020
„Г-дине Апасиев, како за прв обид вие добивте голема доверба од страна на народот, кој и самите знаете дека се повеќе уморни отколку револтирани и бесни спрема гардата која со години си прави „на ти го – дај ми го“ на власта, истовремено осиромашувајќи го народот и изобличувајќи ја државата, додека го преполнува сопствениот џеб. Бидејќи влевате некоја искра надеж, особено кај помладите генерации, дајте покажете се во вистинско светло и за почеток кажете ни како со заеднички сили да го сопреме овој бесрамен чин на лудило, за кој веруваме дека преку ноќ ќе се оствари. Нека ова биде наш и ваш заеднички проект со кој ќе зачуваме еден „споменик“ на Скопје, кој и во иднина ќе биде собирно место на уметници, незаборавни претстави и концерти, како што некогаш беше. А народот ќе памти, па ќе врати.“
Драги сограѓани, дајте да реагираме на време, бидејќи сценариото ви е познато од минатото, односно преку ноќ ќе дојде спремна машинерија која ќе го срамни местото со земја и тоа додека сите се на одмор или некој нареден продолжен викенд. Да не дозволиме ова да се случи. Секој пат започнува со првиот чекор. Дајте да згазнеме цврсто на земја и конечно да кажеме СТОП на ова лудило – полудо од Корона!